સુરતમાં ઓનલાઈન વેચાતા પ્રખ્યાત બ્રાન્ડના નકલી સાબુ ઝડપાયા

ન્યૂઝ18 ગુજરાતીના અહેવાલ મુજબ સુરત શહેરમાં બ્રાન્ડેડ કોસ્મેટિક્સના નામે ચાલી રહેલા છેતરપિંડીના એક કૌભાંડનો પર્દાફાશ થયો છે. લસકાણા પોલીસ સ્ટેશનની સર્વેલન્સ ટીમે ચોક્કસ બાતમીના આધારે ગઢપુર રોડ પર સ્થિત સહજાનંદ હબની એક ઓફિસમાં દરોડા પાડ્યા હતા. આ કાર્યવાહી દરમિયાન જાણીતી કંપનીના નામે ડુપ્લિકેટ પ્રોડક્ટ વેચવામાં આવી રહી હોવાનું બહાર આવ્યું હતું.

દરોડા દરમિયાન બે શખ્સો ઝડપાયા

પોલીસે સ્થળ પરથી બે આરોપીઓની અટકાયત કરી છે. ઝડપાયેલા વ્યકિતઓમાં ૩૧ વર્ષીય ચીરાગભાઈ નાગજીભાઈ રંગાણી અને ૩૪ વર્ષીય દિપકભાઈ કાળુભાઈ રાદડિયાનો સમાવેશ થાય છે. પ્રાથમિક તપાસમાં જાણવા મળ્યું છે કે આ બંને ઈસમો મૂળ અમરેલી જિલ્લાના સાવરકુંડલા તાલુકાના વતની છે અને હાલ સુરતના વરાછા તથા સરથાણા વિસ્તારમાં રહે છે. તેઓ આર્થિક લાભ મેળવવાના હેતુથી ગ્રાહકોને ઓનલાઈન માધ્યમથી આ માલ પહોંચાડતા હતા.

લાખો રૂપિયાનો મુદમાલ જપ્ત

પોલીસ તપાસ દરમિયાન ઓફિસમાંથી ‘GHAR SOAPS AYURVEDA + SCIENCE MAGIC SOAP’ નામની બ્રાન્ડના નકલી સાબુના ૨,૦૦૦ બોક્સ મળી આવ્યા હતા. દરેક બોક્સમાં ત્રણ નંગ સાબુ હતા. પોલીસે પ્રતિ બોક્સ ૧૦૨ રૂપિયાની બજાર કિંમત ગણીને કુલ ૨,૦૪,૦૦૦ રૂપિયાનો જથ્થો જપ્ત કર્યો છે. ત્વચા માટે અત્યંત જોખમી સાબિત થઈ શકે તેવી આ બનાવટી વસ્તુઓના વેચાણને પોલીસે ગંભીરતાથી લીધું છે.

આગળની તપાસ ચાલુ

લસકાણા પોલીસ દ્વારા બંને વિરુદ્ધ કાયદેસરનો ગુનો દાખલ કરવામાં આવ્યો છે. આ નકલી સાબુનું ઉત્પાદન ક્યાં થતું હતું અને આ નેટવર્ક સાથે અન્ય કયા લોકો સંકળાયેલા છે તે બાબતની વધુ તપાસ પોલીસે શરૂ કરી છે.