મોડાસામાં આવેલ પ્રસિદ્ધ મિની ઉમિયા માતાજી મંદિરે રવિવારે આસો સુદ એકમના પવિત્ર દિવસે શારદીય નવરાત્રીનો મંગલ પ્રારંભ થયો છે. દિવ્ય ભાસ્કરના અહેવાલ મુજબ, કચ્છ કડવા પાટીદાર સમાજ દ્વારા શાસ્ત્રોક્ત વિધિ મુજબ માતાજીના જવારા અને ઘટસ્થાપનનું આયોજન કરવામાં આવ્યું હતું. નવરાત્રી પર્વને મા ભગવતીની ઉપાસના માટેનો શ્રેષ્ઠ સમય ગણાવતા મહંત વિષ્ણુપ્રસાદ શાસ્ત્રીજીએ જણાવ્યું હતું કે, આ પાવન ધરા પર માતાજીના બેસણા હોવાથી વિશેષ આરાધનાનું મહત્વ છે.
ઉત્સવના ભાગરૂપે નવરાત્રી દરમિયાન દરરોજ રાત્રે મહાઆરતી અને ચંડી પાઠનું આયોજન કરવામાં આવ્યું છે. આસો સુદ આઠમના દિવસે વિશેષ પૂજન-અર્ચન સાથે ચંડીયાગ હવન પણ યોજાશે. નવરાત્રીના આગલા દિવસે સાંજે માતાજીને ગંગાજળથી સ્નાન કરાવી, નવા વસ્ત્રો અને આભૂષણોથી શણગારી ફૂલદીપ અર્પણ કરવામાં આવ્યા હતા. આ નવરાત્રીમાં ભક્તો ઉપાસના કરવા સાથે ખેલૈયાઓ ગરબે ઘૂમીને માની ભક્તિ કરશે.
